Malaysia

மலேசியாவில் அமைச்சர்களின் சம்பளம் 10 வீதம் குறைக்கப்படுகின்றது: மகாதீர் அறிவிப்பு!

23/05/2018

725

மலேசியா: அமைச்சர்களின் சம்பளம் 10 விழுக்காடு குறைக்கப்படுவதாக பிரதமர் துன் டாக்டர் மகாதீர் முகமட் அறிவித்துள்ளார். புதன்கிழமை அமைச்சரவை கூட்டத்துக்கு தலைமையேற்றப் பின்னர் செய்தியாளர்களை சந்தித்தபோது டாக்டர் மகாதீர் இதனை அறிவித்துள்ளார்.

நாட்டின் கடன் சுமை ஒரு டிரில்லியனை எட்டியிருக்கிறது. இந்நிலையில் வாழ்க்கை செலவினமும் அதிகரித்துள்ளது. இதில் அமைச்சர்கள் ஏக போக வாழ்க்கையை வாழ்வதற்குப் பதில் அவர்களின் சம்பளத்தில் 10 விழுக்காடு பிடித்தம் செய்ய அனைத்து அமைச்சர்களும் ஒப்பு கொண்டுள்ளதாக துன் டாக்டர் மகாதீர் தெரிவித்துள்ளார்.

அமைச்சர்களைக் காட்டிலும் அரசாங்கத்தின் உயர் பதவிகளில் உள்ள சில அதிகாரிகள் அதிக சம்பளத்தைப் பெறுகின்றனர். அவர்களும் நாட்டின் கடனில் பங்குப் பெற நினைத்தால் தங்களின் சம்பளத்தை சிறிதளவு பிடித்தம் செய்ய அனுமதிக்கலாம் என்று மகாதீர் கூறியுள்ளார்.

1981 ஆம் ஆண்டில் தாம் முதல் முறை பிரதமராக பதவியேற்றபோது , அப்போதைய அமைச்சர்களின் சம்பளத்தில் பிடித்தம் செய்ததையும் மகாதீர் செய்தியாளர்கள் சந்திப்பில் நினைவு கூர்ந்தார். முந்தைய அரசாங்கத்தின் பிரதமர் அவ்வபோது செய்தியாளர்கள் சந்திப்பை நடத்துவதில்லை.

குறிப்பாக அமைச்சரவை கூட்டத்துக்குப் பின்னர் செய்தியாளர்களிடம் பேசுவதில்லை. ஆனால் நான் சர்வதிகாரி இல்லை என்பதை நிரூபிப்பதற்காகவே செய்தியாளர்களை அவ்வபோது சந்திக்கிறேன் என மகாதீர் தெரிவித்துள்ளார்.