கடந்த 2021-ஆம் ஆண்டு நிலவரப்படி உலகின் இராணுவச் செலவுகள் 2.1 ட்ரில்லியன் மொலர் அளவை எட்டியுள்ளது. இது, இதுவரை கண்டிராத உச்சபட்ச செலவு எனத் தெரிவிக்கப்பட்டுள்ளது.
ஸ்டாக்ஹோமை தலைமையிடமாகக் கொண்டு செயற்படும் சர்வதேச அமைதி ஆய்வு மையம் (SIPRI) சார்பில் மேற்கொள்ளப்பட்ட அறிக்கையில் இந்த விடயம் வெளிப்படுத்தப்பட்டுள்ளது.
2021-ஆம் ஆண்டு உலகில் இராணுவத்துகாக அதிகமாக செலவு செய்த நாடுகளில் அமெரிக்கா முதலிடத்திலும், சீனா இரண்டாவது இடத்திலும், இந்தியா மூன்றாவது இடத்திலும் உள்ளன. 4 மற்றும் 5-ஆம் இடங்களை முறையே பிரிட்டனும், ரஷ்யாவும் பிடித்துள்ளன.
இந்த ஐந்து நாடுகளும் மட்டும் உலகின் ஒட்டுமொத்த இராணுவ செலவினங்களில் 68 வீதத்தை உள்ளடக்கியுள்ளன.
கொரோனா பெருந்தொற்று காரணமாக ஏற்பட்ட பொருளாதார மந்த நிலையின் போதும் கூட உலக அளவில் இராணுவத்திற்கான செலவு, வரலாற்று சாதனை படைத்துள்ளதாக சர்வதேச அமைதி ஆய்வு மையத்தின் பணிப்பாளர் டியாகோ லோபெஸ் தெரிவித்துள்ளார்.
மேலும், உலகளவில் பணவீக்கப் பிரச்சினையால் பொருளாதார வளர்ச்சி தேக்கமடைந்த போதும் கூட இராணுவத்திற்கான செலவு 6.1 சதவீதம் அதிகரித்துள்ளதாகவும் அவர் சுட்டிக்காட்டியுள்ளார்.
2020-இல் இராணுவ செலவு உலக மொத்த தேசிய உற்பத்தியில் 2.2 சதவீதமாக இருந்த நிலையில், 2021-இல் அது 2.3 சதவீதமாக உயர்ந்துள்ளது.
அமெரிக்கா 2021-இல் 801 பில்லியன் அமெரிக்க மொலர்களை இராணுவ மேம்பாட்டுக்காக செலவு செய்துள்ளது. அதுவும் குறிப்பாக இராணுவ ஆராய்ச்சி, மேம்பாட்டுக்கு மட்டும் 24 வீத தொகை செலவு செய்யப்பட்டுள்ளது. ஆயுத கொள்முதலுக்கான நிதி ஒதுக்கீடு 6.4 சதவீதம் ஆகக் குறைந்துள்ளது.
இதே காலக்கட்டத்தில் சீனா 293 பில்லியன் அமெரிக்க டொலர்களை இராணுவ செலவீனத்துக்காக ஒதுக்கியுள்ளது. இது 2020-ஆம் ஆண்டுடன் ஒப்பிடும்போது 4.7 சதவீதம் அதிகமாகும்.
மூன்றாவது இடத்தில் உள்ள இந்தியா 76.6 பில்லியன் அமெரிக்க டொலர்களை செலவு செய்துள்ளது. 2020-ஆம் ஆண்டுடன் ஒப்பிடும்போது இராணுவத்துக்கான செலவை இந்தியா 0.9 சதவீதம் அதிகரித்துள்ளது. இந்தியா உள்நாட்டு இராணுவத் தயாரிப்புகளை ஊக்குவிக்கும் பலப்படுத்தும் விதமாக 2021 பாதுகாப்பு நிதிக்கு ஒதுக்கப்பட்ட நிதியில் 64 சதவீதத்தை உள்நாட்டு இராணுவ தயாரிப்புகளை வாங்க செலவழித்துள்ளது