ஆசிய பசுபிக் பிராந்தியத்தின் மிகப்பெரிய பிராந்திய சுற்றுச்சூழல் நிகழ்வான ஐந்தாவது ஆசிய பசுபிக் மன்றம் இன்று கொழும்பில் ஆரம்பமாகவுள்ளது.
ஐக்கிய நாடுகளின் சுற்றுச்சூழல் திட்டம் (UNEP) 41 உறுப்பு நாடுகளின் பங்கேற்புடன் எதிர்வரும் 6 ஆம் திகதி வரையில் இடம்பெறவுள்ளது.
இந்நிகழ்வை சுற்றுச்சூழல் அமைச்சு மற்றும் ஐக்கிய நாடுகளின் சுற்றுச்சூழல் திட்டம் என்பன கூட்டாக இணைந்து ஏற்பாடு செய்துள்ளது.
300 இற்கும் மேற்பட்ட வெளிநாட்டு பிரதிநிதிகள் மற்றும் 100 தொழில் வல்லுநர்கள் இலங்கையின் பங்குதாரர்களுடன் கலந்துரையாடல்களில் ஈடுபடுவார்கள் என ஏற்பாட்டாளர்கள் எதிர்பார்க்கின்றனர்.
நைரோபியில் பிப்ரவரி 24 முதல் மார்ச் 1, 2024 வரை திட்டமிடப்பட்டுள்ள ஐக்கிய நாடுகளின் சுற்றுச்சூழல் பேரவையின் (UNEA) ஆறாவது அமர்வுக்கான பிராந்திய உள்ளீடுகளை வழங்குவதே இந்நிகழ்வின் முதன்மை நோக்கமாகும்.
இதேவேளை, காலநிலை மாற்றத்தினால் பாதிக்கப்படக்கூடிய வளரும் நாடுகள் எதிர்கொள்ளும் கடன் சுமையை நிவர்த்தி செய்வதற்காக காலநிலை நீதிமன்றம் ஒன்றை நிறுவுவதற்கு இலங்கை உத்தேசித்துள்ளது, இது 2023 டிசம்பரில் COP28 இல் கவனத்தை ஈர்க்கும் என எதிர்பார்க்கப்படுகிறது.
இதற்கிடையில், இந்த நிகழ்வை நடத்துவது சர்வதேச உறவுகளை வலுப்படுத்தும், வெளிநாட்டு மானியங்களை அணுகுவதற்கு வசதியாக இருக்கும் மற்றும் இலங்கை தனது சுற்றுச்சூழல் சிறந்த நடைமுறைகளை வெளிப்படுத்த அனுமதிக்கும் என்று ஜனாதிபதியின் ஊடகப் பிரிவு தெரிவித்துள்ளது.
காலநிலை மாற்றம், பல்லுயிர் இழப்பு மற்றும் மாசுபாடு ஆகிய மூன்று உலக நெருக்கடிகளை நிவர்த்தி செய்வதற்கான தொடர்ச்சியான முயற்சிகளின் ஒரு பகுதியாக ஆசிய பசுபிக் மன்றம் செயற்பட்டு வருகின்றமையும் குறிப்பிடத்தக்கது.